Поранешниот Амбасадор на Србија во Белорусија и дипломат со огромно искуство во дипломатски мисии во Москва, Приштина и Софија, Д-р Среќко Ѓукиќ е гостин во овој Лавиринт. Го анализиравме доаѓањето на кинескиот Претстедател, Си Џипинг во Белград и Париз, но ги анализиравме и актуелните воени жаришта во Украина и Газа, како и односите на Балканот.

Дипломатот Ѓукиќ очекува ескалација на фронтот во Украина која ќе биде показател за тоа во кој правец ќе се движи војната и вели дека Русија добива повеќе помош од своите сојузници, отколку Украина од своите пријатели на Западот.

За дијалогот Белград – Приштина, дипломатот смета дека идниот Специјален Пратеник на ЕУ за овој дијалот, кој најверојатно ќе биде поранешниот Претседател на Словенија, Борут Пахор, и во пракса ќе го оствари она што го направи досегашниот Пратеник Мирослав Лајчак, а тоа е завршување на формалната рамка со Бриселскиот договор и Охридскиот Анекс.

Што се однесува до проширувањето на ЕУ, Ѓукиќ вели дека Унијата конечно сфати дека зачленувањето на балканските држави, како и на Украина и Молдавија е нивна безбедносно стратешка цел и очекува во наредниов мандат тоа да се оствари.

Гостин во ова издание на Лавиринт е и директорот на ЗНМ, Драган Секуловски со кого разговаравме за безбедноста на новинарите, нападите кон нив преку компјутерски систем, но и за правата на новинарите да известуваат од избирачките места. Секуловски потсети дека ова се први избори во земјава кадешто новинарите имаат својство на службени лица.